Oberaargauer Lied

Uf der Hohwacht bin i gstange,

zytig scho vor Tag und Tou.

Ha verlore abe gstuunet

uf e schön Oberaargou.

I de stüue Dörfer nide

han i d Glogge ghöre goh;

d Amsle hei is Lüte gliedet

u du hets mi übernoh:

Heimatgou

im Bärnerland,

du bisch lieb und woubekannt.

Uf der Hohwacht bin i gstange,

zmitts im höche Summertag,

über mir der bländig Himu,

Sunneglanz u Lercheschlag.

Unger mir sy goudig Wäue

über d Fäuder z trybe cho,

Meitschilache, Schnitterlieder:

Wieder hets

mi übernoh:

Heimatgou im Bärnerland,

du bisch lieb und woubekannt.

Uf der Hohwacht bin i gstange,

won es stüu vernachtet het,

u no einisch het my Heimat

wie ne Mueter zue mer gredt.

So ne guete, töife Friede

cha mym Härz süsch niemer gäh,

gäng ou wieder

darf is gspüre,

gäng ou wirds mi übernäh:

Heimatgou im Bärnerland,

du bisch lieb und woubekannt.